Revelation 1:7
Veuvin, ama meihotoh ki-lhonin ahunge; chule mit jousen asunho tah jong chun amu dingu ahi; chule leiset namtin le phungtinin a-op achup chup dingu ahi. Chuti ahi, Amen.
JESU HUNG VAH DING AHITAI
JESU HUNGVAH DING AHITAI TI THUSO LAHKHOM
Jesu hungvah ding ahitai ti thuso hi kum 40 masanga ana kiso ahin, ahinla kanatohna toh kakop thei lou phat a ana kiso jom jou lou ahitan, tuhin Pathen lungset jallin kana tohna a kona kakichol toh lhonin, Pathen phatsah ahileh Jesu hungvah ding ahitai ti Thuso hi whats-app group le digital plateform a sojom kitdingin akingaitoi.
A BRIEF TESTIMONY OF MR.SHONKHOGIN (HEGIN) HAOKIP
1. KAPENTHAH MASANG HINKHO PHABEP: Amasapen tah in keima hinkho thusim a konin kapat nomin, aban bana Pathenin eima puina dungjuijuva chejom dingin, taona akineijin, hijeh chun keima hi kaneolaija pat-in Pathen hou kana tha nom lheh jengin, ahinla kapa chu thempu ahijeh in, Christian kahiding eina phalpoi. Kum 13 don in kapa hetlou kah in Pathen na kanalut tai. Pathen na kalut nia pat’in kahinkho hi aphalou Pathen thu toh kitoh lou kitiphot chu kabol tapon, Pathen hou khat hina jallin kahinkho chu dihtah a hing dingin kana kitemin, hijeh chun mi mu dingin mipha tah’in kana umin ahi. Hiche toh kilhonin, thilpha bolna lama hihenlang Pathen natohna lampang hijongleh, Pathen kin kiti phot phot chu thanom tah in kana pangin ahinla lungthima kona kipan ana hilou jeh chun, aga ana umjoupon ahi. Apolama mipha dana kaum vangin kasung lam chu koima val kahi dehpoi, Pathen mitmu din mi chonse chu kana hi thou thou in ahi. Adihtah a Pathen kahouthei lou vangin kalungthima hin Pathen dihtah ngai chatna aum jing jengin, Pathen hollin suh len toulen anakithon, tichu Pathen thu kiseina jouse-a ka chelouna le kajaolouna behseh ana umpon, adehin Imphal sunga thuseiho jouse hi kana jaolouna behseh aumpoi. Ahivangin lungmona dihtah ahilouleh lunglhai na dihtah kana mujoupon, ahinla Pathen in ama kangai chatna chu eihet pi jingin, amatoh kimuto teina dingin lampi ahin gongtan, hiche lampi chu ipiham itileh, chutobanga miphalhem a kaum laitah chun, P.U.C exam kahung fail tan, kahinkho-a exam fail khalou kanahijeh chun, naa kasabehseh in vamaang ding chan geijin lung kana ngaitotan, 2 chutobanga lungthim ka ngaito laitahin, Pathen in kakoma nava maang a hoilaiham khatna thile chun, nalhagao hoilang asuhding hitam eitin, chuphat’in keijong kakigel leh, DAMUN MEIDIL tilou adang aum tapoi, ti kahin gel doh phat in Pathen giltah leh thuhtah a kahin holleh, michonse damun meidil cheding kahi ti kaki hetdoh phat in, kachonset na ho jeh in tija kichan kana umin, chonsetna ho chu iloding hitam tin, lunggim lungkhamin kanaumin, hichelai tah chun Pathen mipa khat in, Proverb 28:13 ahin simin, KOIHILEH ACHONSET NA SELGUH ACHU KHANGTOU LOU DING, AMAVANG KOIHILEH ACHONSETNA HO PHONGDOH A DONLOUVA KOIPAN PATHENA KONA HEPINA AKIMUDING AHI, atichun kalungthim a thanopna leh kipana adimset tan, chonset suhmangna thei thudol ka muchun kakipah lheh jengin,hichun, kakikholin ahileh themmo kachanpi thei chonsetna ho jouse chu keidinga Calvary thing cross chunga anathi Pakai Jesu koma kisihpumin kakiphongdoh in, ngaidam kaki thum in, ahinla amasa pena kachonset kakiphon ni chun, ka cinema vetnomna ho chu kana phongdoh ngam tapon, ipijeh in em itileh phongdoh jongleh kanung vet kit ding jeh chun kana im dentan ahi. Hijehchun, chonset dang tamtah kaphon doh vangin kalungthim sunga kipana dihtah kananeipon, mihon a pengthah tai ati vanguvin keima kana pengthah pon ahi. Chomkhat jouvin, ka houbung mite hon tahsan-a Baptaiz bol dingin eihin koutaove. Keijong kaga cheleh nilhah chun an-ngola taona neija kikhol dingin kaumtaovin, Pathena katao laitah uvin, Pathen lhagao thengin, counselling einaboltan, hitihin eihoupin ahi. ACHONPHA LOU CHUN CHONPHAT LOU BOL JING HEN, ABOH A CHU BOH JING HENCHULEH ACHONPHA A CHUN CHONPHAT BOL JINGHEN, ATHENG A CHU ATHENGIN UM JING HEN, VEUVIN KEIMA KA HUNG VAH DING AHITAIThuph.22:11, eihintin ahi, chuin keima dingin eiledoh peh kit in, Cinema vehon vejing taovin, avelou hon vetda tao vin, Veuvin keima kahung vah ding ahitai eihinti. Chuin keijong naa kasa behseh jengin, Pathen keiman Cinema vetapong kate, lungset tah in neingaidam’in katileh, satan in eiphoh in, najoujou chun Pathen koma kitem hih tang, ajouleh namit chot lo ding hichu, ahin titan ahi. Hiche phat chun keijong kakigelleh satan thusei chu adihtoh akilouve, ipijeh in am itileh, tumasang a chu cinema vetlouna dinga ijatvei ham 3 khat chu Pathen henga kitepna kananeija khatvei cha jong kajothei lou mong mong ahitai, hijeh a chu eihin pho ahi. Hichepet tah chun Pathen in challenge eihin boltan, namit achot le chotante, Bible Mark 9:47 in ..MIT NI NEIJA DAMUN MEIDILA NAKILE LUT SANGIN, MIT LANGKHAT CHOA VANGAM LUTCHU NANG DINGA GAMCHANGIN APHAJOI eihinti ahi. Hichephat chun keima jong kakap jah jengin, kathi le thi kahin le hing tin Pathen koma kalungthim apumpia kakipehlut leh satan jong athip bet tai. Hichun, Pathen in eihin donbut paijin, KEIMA CHRISTA TOH THINGPELA KIKHENBEH THAA KAHITAI, KEIMA AHINGA KAHI TAPOI, CHRISTA CHUKEIJA HINGA AHIBOUVE, TUA TAHSA PHE-A KAHIN HI KEIMA EINGAILUA KEIMA DINGA KIPEDOH PATHEN CHAPA TAHSAN VANGA CHU HINGA KAHI BOUVE. Gal. 2:20 tin eina houpin ahi. Chuche nia patchun Pathenin cinema addict kanahina chu aman apetpet in einalahdoh pehtai. Hiche a kon chun Pathen in kahinkho eihin khel peh in, lhagao lam mopohna le phaat phat loudanho eimusah in, kapenthah jouva pat-in Pathen in lhagao mangthah ho lainat pina jallin, message aphat aphat chan eina pen ahinla keima la aseidoh theijin kana umpon, hijeh a chu, hiche thuso JESU HUNGVAH DING AHITAI ti thupi hi mangcha a Pathen thu Pathen in eipeh ho chu kana sutdohji a ana kihom ji ahin, kum phabep akiso jouva kanatoh toh kana koptha jou lou phatna chu kana ngah ahitai.
2. PENTHAH JOUVA HINKHO A TOHKHOMPI DINGA JIDING KAHINHOL DAN: Pathen cha hina kanei jouvin, akham kham in Pathen na ahung kitong in, chuban in jinei phat ahung hi toh kilhonin hinkhoa Pathen na tohkhompi thei ahung kihol in ahileh, Pathen na tohkhom pithei numei chu ana hahsa lheh jengin, nikhat hi Pathen henga an-ngolin gomi phung noi khatna katao lai tahin Pathen in kichieh tah in eikihoupin, aman keima koma hiti hin eina seipeh e. Naji dingin lungkham hih-in, keima naa natoh chu phate chan tongin, nana toh dungjuija naji kapeh ding nahi eihin tin ahi. Hiche phat chun keijong kaki pah lheh jengin, Pathen koma hitin kana taotai. Henge Pakai nasei bang bangin bol tange tin, hiti hin kana tao ve, Pakai leiset chunga nungah ahoi 4 apha aching athem tamtah umjongleh, keima ding hilou ho chu itabangin hoihenlang itabang in pha jongleh keima mit vet in, ahoi jin neimu sah hih beh in. Amavang kei ma dinga na phat sah pen pen chu, hoihen lang hoi hih jongleh keima mit mu-in ahoitah in neimu sah in, achutilouleh nang man neideipeh chu kahet thei lou ding ahi katin, anakiti tobang bang chun Pathen in eina lolhit peh in, tua kaloinu hi aneova patna kanamujingsa, kana hetjing sa ahin, ahinla amatoh kichenna ding lungthimhi ana um khapon, ama hi Imphal a ana khanglen ahin, keijong Imphal a lekha sim a kana um ahi. Keihin Pathen na tohkhom pi dinga hi mun chomchom suhvet touvet kanatho ahin, Pathen in kataona bang banga eihin bulhit pehni chun, kagel phahlou beh in, a in uva Pathen thu jalla kikhopna khat um ahin, hiche a kaga che na a amahi kana taona bang bangin Pathenin eimusahtan, kidang kasalheh jengin, chuin insung mite koma athuhi akilhutna ahileh amahonjong Pathen lenggam jallin, imacha boilou hel in ahinphatsah soh kei taovin, hiche a kona chu jineina hi kahin nei ahi. Pathen dong puma hung kibol ahitoh kilhonin, kakichen kal lhonhi kum 39 aval tan, kajinei hi kaki sihpi khahpoi, tihi Pathen loupina dinga kahin phondoh nom ahi.
3. JINEIJOUVA INCHEN SEMNA DINGA GOVT. NATOH KA HIN HOL DAN: Abanin Inchen semna dingin Govt. natoh ahung kihol in ahileh, Pathen phatthei boh na jallin, natoh tampi ahung kimun, tampi kimulah a chu ideidei ana kiki lhena a Bank Natoh hi achaina kana kilhen khah ahi. Hiche kana lhenlo na jong hi, Pathen thujalla kanalhen ahi. Bank a kilutleh khonung thuguh ho hi kiha hetbe thei dingham, adeh a 666 kitihohi kanaboipi ten ahin, hicheho them jeh a chu Bank kana kilhen khah ahi. Ahin la khonunga kavetleh Pathenin eilungset na jalla chu keidinga kihinsona tahsa lama hihenlang lhagaolam hijong leh Pathen thilgon anahikhan ahi. Natoh dangho jouse chu lekha hasima kisima kibol ahin, Bank penpa vanghi Manipur Govt. noija natohna kineisa ahitah jeh a chu lekhajong simchom louva Bank kilut leh khonung thuguh ho kihet bente tina sehseh chubouva chu kaga bolleh kahin mu ahin, Pathen peh mong mongin kalai. Bank na toh kahin muphat’in, State Govt. natoh chu resign kakibolin Bank chu join kaboltai. Bank a kahunglut jou phat in, Pathenin kahinkho operation ahinpantan, insungah 5 damona jat chomchom ahinlha luttan, nehlechah lhah samna, kaji dammona, kacha dammona kitihohin, nasatahin kahinkhohi asugenthei lheh jengin, lungdon man in Pathen na kitongleh phadom dingham, tin Local church a head deacon kumthum kumli ahung kipangin, in na touman loukhop in Pathen natohna a suhlhai toulhai akithon, imacha apha chompon, hinkho jong apha chompon, mijong koimacha anakihuhdoh joupoi. Hiche a kamudoh khat chu ipiham itileh, Pathen lunglhai sah na ding a anaa toh ham akin na kimanchah ham hin, Pathen alunglhaisah theipoi. Hingjing Pathen Pakai Jesu hi anaa toh peh a thilpeh tamtah tah peh a lunglhai thei Pathen chu ahipoi, Aman amasapen tah a adeipen tah chu ahileh, ilungthim pumpiuva, lungthim pohkeh leuva (broken and contrite heart) ama iholdiu hi alunglhaina pentah chu ahi. Anaa tohpeh leh thilpeh a kipah lunglhaiho pathen chu milim houho pathen ahibouve. Hiche chun ama natohna le thilpehho bollouding ahilouleh nahsah monading tina ahidehpoi, amasa pentah a chu eimatah hi kisuhdih masat angaije tina ahi. Ama lunglhaina ding a Pathen in keima tah eina ngaichat anahin, ken, keima kikhohsah talouva mia dinga kumlhun sih a CRUSADE or CAMP a ding suhlhai toulhai kana tho vang in imacha anapha chom pon, kumsih leh Crusade kabol uvin, sum tampipi kasumang uvin, koimachan la phat chomna in aneipouve. Camp kikhen nileh Revival ahiuvin, nini nithum jou langleh adapjepjep uvin, lhakhat jou leh abep bep ahiji taove. Hiche thu jonghin nasatah a eisuboi ahi. Ipi atileh chubanga kaple maova taotheija chom khat jou phatleh abepbep hijiu hitam tihi boina lentah in kana neijin ahi. Hiche kaboina jong chu kho nungin Pathenin akitohchet in donbutna eina pen ahi. Hiche boina ho jouse tichu natna satna hihen lang, inchen gentheina ho hijongleh chuleh mipengthah ho kipa sot theilou hitiho jousehi Pathenin eisuhtup peh nom ahi tin khonungin kamudoh theijin a ahi.
4. PATHEN IN LEF TOH EISUHTONA AJEH LE PATHEN NATOHNA A KAHUNG LUT DAN:
Hitobang lunggim lungkhama kaumlai tah in, Pathen in amiteho ho khat katohna bank a kimuto din ahinsol in, iti hung ham itileh Bank account honga hung ahin, chulaitah a account honna dinga angai khohtah khat chu ahileh, keiho Bank a 6 account neisa khat ham ahi louleh staff khat in INTRODUCE abol angaijin, amanla koimacha account nei ahepon ajojonan keikoma ahinsol lut uvin, ken ama chu account honna dingin kahet khah lou beh ahivangin kahenai tin ahe tabang bangin in INTRODUCED kanabolin, hiche account kihon jou chun, aman keima LEF a kikhomdin INTRODUCED eina bolin, hiche nikho chun keiman kanahet lou vangin Bank a kana lutlona ajeh chu lolhit in ana umin ahi. Chua pat in LAYMENS EVANGELICAL FELLOWSHIP, a kahung kikhom panin ahileh kaboina ajeh hochu ol ollin kahin kihetdoh chehcheh tan, ijeh in em itleh ken kato tobangbang chu amahon jong anato sau anahi. Pathen mipa N.Daniel hin mun khatna hi Crusade anabol na a chun, eiholang Crusade ho bangin, amaho jongchu Pathen thu ajahphat u chun achonset u akihetdoh uvin, kaple mao pumin anatao uvin, lamkaipu chun hiche vanghi apengthah mongmong ahitaove tia ana ngaito ahitai. Ahinla kumkhat jouvin hiche ho kaplemao puma kisih ho loi chu abepbep ahitaove tithu ajah phat in amanjong Pathen koma ataotan ahileh Pathenin ama ho chu jungneilou, songlheo lah a keh muchi ho tabang ahi bou uve tin Pathenin anahetsah in ahi. Anahetsah goh keo hilou vin, vision tabangin muchi thepa thulem avetsah tan, hiche a kona chu, MUCHI THEPA THULEM Bible Class hungkilapan ahi. Hiche Bible class dungjuija penthahna neiho jouse chu athichan geijin mi atamjo nunglhuh malhuh athopouve, Pathen na tongpum pumin leiset anadalhaove tihi mi tamtah chunga akimutheije. Hiche thu kajah phat chun keijong katha anom lhehjengin, hijeh chun, Keijong hiche Bible Class dungjuija Pathen kahin hol a kona i-tabang mi kahim ti chu kahung kihe doh in, tila chu keima kaneova patna thilse bolkhalou beh tabanga kigel kahin, kakichonphat sahna (self-rightiousness) hinkho a anakihing ahin, ipi ibol vanga imacha ana phachomlou anahi. Hita banga Pathen chu dihtah a kahin holphat in, nikhat hi Pathen in amipa kidangtahin ahin mangchan, hiche Bible changa pansa a Pathen thu ahinsei chun, kalungthim hema kisun kabangtan, aman ahinsimin, “PHATECHAN KIHET CHENIN,NACHONSET NA IN NIKHAT LEH NAHIN HOLDOH DING AHI”(Be Sure, Your sin will find you out) Number.32:23. Hiche thu kajah nichun, kati akithing leuve, ipi jeh in em itileh keiman guhthima kanabol chonsetna ho chun nikhatleh eihin holdoh uva eihin mat ding chu 7 kichen tah in kamutai. Keiman koima chan eimupoi kana ti chu Pathen CCTV Camera in abona coverage anabolsa ahitai ti kahetdoh chun, kakicha mama jengin ahi. Hiche ni chun kachonsetna nikhatleh eihin holdoh dingho chun, i-umchah kheh taovin, jamna ding mong mong aum tapoi.Hiche a bol ding pen chu kineosah a ama ama koma kisih puma ngaidam ki thum ding tilou lam dang him him aumtapoi. Hiche chun, ipi jeh a kigentheija, ipijeha kidammo a, ipijeh a nehle chah sille chenna kilhasam ham tiho jong eimudoh sah-e. Mihemhi ichonset phatleh ase apha het khenna hi kilhasamji ahitai. Hijeh a chu itobangin kigenthei jongleh kikihedoh theiji lou ahi. Pathen thu holgilna ahung kineiphatna chu, ipijeh a kaji dammo a, ipi jeh a kacha damlou ham ? Amasapen tah in, keima chonsetna ho jouse Pathen in eimudohsah in, adeh in kajinei na dihlou jehin kaji kacha kagenthei sah lheh jengtai ti kahe doh in, hiche jeh chun, kasuh khel ho jouse koma ngaidam thumdin, suhlhai toulhai kana thon, ipijeh in em itileh Keiman Pathen dounaleh mihem dounan in chonset lentah kanabol dohtai. Mipi le Pathen angsunga HOLY MARRIAGE kana bol lhon in, ahinla asunglama athen-ding dol lin kana thenglhon tapoi. Mipi ahungkikhom jousele Pathen kajoulhep jeh in, hinkhoa gim gentheina thohpi dingkhop in kana umtai. Hiche jeh tahtah a chu kajin dammona sangtahtah anatoloa, kakhelna kahet dohthei deh louphat na, kachapa lenpen chunga dammona phalou tahtah a eipho kit anahi. Hicheteni dammo nahin kahinkhohi imutheilou, netheilou khop a gentheina kanatohna chu thildang ahipon, Pathen chakhat ana kihita a chubang chonsetna lentah kanabol la imacha bollou banga kana umjeh pentah chu anahi. Aban na office a thil kibol khel ho jouse ahungkiphong doh in, tilla thil neocha cha kiti ho chu lentah tah thina thei ngen ahungsoh doh tan, Pathen angsunga kineosah nale kipelut pumin kisutheng dingin kanomtan, nopna kapeh lhah jou phat in Pathen in ahahsa umlouvin, abonchan khat le khat kikah boina hihen lang govt. toh kikah lah hijongleh abonchan, Pathen ang sunga themmo nathei kiti jouse le ki-oimona thei kiti jouse chu akiki houtoh in hiche a konin Pathen koma chonset ngaidam na aki thum in, hiche a konin Pathen in, nachonset nan nahin mat ding ahi, kiti chu, Tunvang nachung thu kikhol in tin nathemona khatcha kimu talou ding ahi. Nachonset naho nakigeldoh pehkit louhel 8 ding ahi ati. Hiche thu kajah ni chun, kaki pah lheh jengin, hiche a patna chu kalhagao hinkho hung kido doh kit anahi. Hitabanga Pathen in kachonset ngaidamna eipeh jouva pat in ka insunga dammona adeh a kaji dammona doctor tamtah in asuhdam joulou chu, Pathenin kachonsetna lhon eingaidam peh lhon phat in, adamna theiding loukhat kahin kihetdoh lhonin, hiche a konchun hinkho kahin man beplhon ahi. Chuleh kacha damona vang chu Pathenin kachonset eingaidam dam chun amajong adam thengseltai. Hitabanga hi Pathenin eisuh hala eisuhdam nom u ahin, kenla kana het loujeh a thildang dang kana bol vangin imacha ana phachompoi. Pathenin eikiledohsah (restore) jouphat’in boina ho tichu, kaji dammona hihelang kacha dammona hijongleh eilahdoh peh tai. Chujongleh chuche nia konin, nehle chah jong imacha avat alhinglal aumtapoi. Ajehchu Pathen eisuhhal nom jeha chu eina suhgenthei ana hibouve. Hitoh kilhon chun, insung mite Pathen hinkimu aban banin ahungchal in ahi. Chuleh kum 34 val jen Bank na kahin tohna a jong service sung sesen, Pathen lungset na jallin, imacha boina hahsat na um lou hellin, tichu Bank natoh hi risky lheh jongleh boina beihel lin, ahung kichai theijin, chubana kum 34 sunga hi kadeideina a transfer kachea ahivanga kainmuna kona kapansat thei jonghi thilkidang khat ahin, hichejonghi Pathen bol ahibouve. Ajehchu munchoma cheding dana a promotion kanadeilou ahin, ahinla Promotion eihin peh jou uvin jong ka in muna pansan kanakai thei nalaije. Abanah Pathen in ama ngailut theina ahilouleh ama ngaichat theina lungthim le tha eina peh jeh in jong Pa Pathen kathangvah e. Lhagao le Tahsa lama zero a hung kipan kahi lhon in Pathenin goulah a gouloupipen chapa li eipe lhonin, chuleh nehle chah sille chen chuleh chenna gena chuleh chele valena dinga kangaichat ho jouse aphat phat cha a eipeh jeh in jong Pathen Kathang vah in, loupina jouse Pa Pathen changtahen. Imajouse ama a kona bou kimu ahibouve. Ajehchu dihtah a hinkho man tichu nehguh chahguh nelouva thengsella hinkho man kitichu thilnom ahipoi, avat alhinglal kiti chu dimset jeng ahi. Ahinla Pathen loupina dinga kaseinom pentah chu ahileh imacha investment, savings, plan akibolthei louvangin Pathenin akul akhoh ho jouse aphat phat chan supply eihinbol toupeh uve 9 tijong kaseinome. Hijeh chun aman, amasapen tah in Ama Lenggam leh achonphatna holdoh masauvin, chutengleh adang jouse jong nakipeh tha diu ahi atihi kahin chepi ahi. Matt.6:33. Pathenin hiche Bible changhi kahinkho a eisuh bulhit peh jeh in jong Pathen kathangvah e. Hichen hi achom lamtah a hinkho thusim api phase chu ahi.
AHIDINGDOL TAH A PAKAI KINBOL KITIHI TAHSALE LHAGAOA HINNALE DAMNA AHI
Nanghon Pakai na Pathenu kinbou naboluva, aman nachanglhah neh ding le natwi don ding phatthei aboh ding ahi; chutengle keiman najalah a kona natna chu kalah manghel ding ahi. Exodus 23:25. Pathen thuhi atahsan tedinga lhagaole tahsa a hinna le damna ahin, atahsan loute dinga vang mohthu mai mai tobang ahi. Kum 30 masanga gentheitah a hinkho kana man laijin, jingkah khat hi lunggim tahleh lungkham tah a Pathen koma katao laihin, Pathenin hiche thu hin eina houpin, kavetleh kidang kasan, ajeh chu hiche laitah a chu kainsung chu natna satna dimset, chuleh nehle chah jong geochao tah a ana um kahin, ipiti hinkho ki manman dingham tia lunggim lungkhama lungthim pumpia Pakai koma kataova chu, Pathenin hiche thuhi eina houpi ahi. Pathen thun hitin anaseije, nanghon Pakai na Pathen u kin nabol uleh Aman nachanglhah nehding le natwi don ding napeh jingding chuleh najalah uva um nanatna ho jouse jong kalahdoh pehding ahi atichun, kakipah lheh jengin, imacha kamuloulai vangin kathil ngaichat ho jouse chu kamutan, kana kipah lheh jengin ahi. Ajeh chu, kalunggimna pentah chu natna satna le anneh twidon thu anahin, Pathenin ama adinga nahinding dola nahin leh hicheho chu kapeh ding nahi ati tobangin kalatan ahi. Chutobanga boldinga Pathen kahinhol gilla kajochanna akhamkhama Ama kina kahung kisah lal a konin, Pathen toh kakikah kahin kisuhtup a ama a kona chonset ngaidamna kahin neija konin, Pathenin eikitep pina (promise) ho chu aban banin ahung guilhung tan, amasapen tah in, ka Quarter komuva hi 10 twisamkhat ana um ahin, ana kihe phalou chu kahin mudoh in, hiche twichu kum 30 lang quarter a kahung chen sunguva hin kantih neilouvin, twi chu kahin mangpeh uvin, keima inn kaki sah uva kaki chon doh jou uvin, khatvei ka quarter chu kaga vetleh twi chu ana kangtan kidang kasalheh jengin, kadalhah phat in Pathenin eikiteppina chu akinung lahdoh tobangin kagelle. Abanin, kainsungu chu, phat jouse a dammo khat umjing jeng anahin, Pathen lungset jallin, hiche dammona jong chu Pathenin einalah doh peh in, adeh in, kanule kapa, kaji le kachapa dammona, louva damtheilou chu Pathenin kidangtah in damdomna le damthengna eina pen itobanga kaki pa hitam ? Pathenin einganse na kinho ahibang tahin kibol doh jou hih jongleh lungluttah a agah kigut chun, Pathenin akin chu lhingsetin eina bol peh in ahi . Achaina achun, hiche a pat chun, insunga anneh twidon jehle natna satna a jeha atumbeh a lunggim lungkhamna chu ana umtapon, hiche a kon chun, Pathenin amasa pentah in ama gamle achonphatna holdoh masan, chuteng adangse nakipeh tha ding ahi ati chu phatechan anaguilhungin, tuni changeijin Pathenin akul akhoh jouse aphat phat chan eipen Pathen kathangvah e. Hijeh chun, sopiteho, Pathen thuhi ingaichatna atah tah a iholphatleh aman ichunga thil kidang tah tah aboldoh ji ahibouve.
-------------------------------------------------------------------------
A-LHAGAO DAMUN NA CHEDINGHO LEISETNA ITI KIPAH THEI DING HAM?
Pathen gingin, chuleh athupeh chengse nitsoh keijin; ajeh chu hichehi mihem tohding pumpi chu ahi. Ajeh chu Pathenin na kitong jouse ase hihenlang apha hijongleh guhthima kitong jouse puma thupi tan na a ahin pohlut ding ahi. Thuhilpa 12:13-14. Leiset miten hinlai damsunga hiche leisetna kipana ding hola suh lhai toulhai ithonah vang uvin, vangam lut thei dinga ium tokahseuvin, ipi bol jongleuhen kipana tah tah chu muthei pou hite. Ajehchu hiche leiset idalhah niniu tonsot damun meidila dinga kihi tadinga chu, hoi lai tah a chuba kipana kimu ding ham ? Apotho a leiset thilho a chu kipana thei tamtah aumvanga chu, asung lam chun achen na ding lampi akihet jeh a chu alhagao kap kap jeng ahi tihi hetpeh jing uhite. Thuhipan aboipihi hinkho ahi. Ipi kitileh anompen dem ahilouleh akipah pen dem tihohi aman aboipipen ahitoh kilhonin, aman patep dinga kilom jouse ahin patep thei in, ajeh chu amachu mihaopen le michingpen chuleh thaneitah khat ana hi jeh chun, abonchan patep theichan anapatep in, ahinla aboljouse pannabei, pannabei huinung dellele tobang kahi tihi ahijing jenge. Aman hitobanga aboncha a ana patep a hicheho ahin kipanale chamna lungmona aumpoi ti photchet na einadalhah peh jeh uvin, Pa Pathen sangtahin ithangvah uve. Chutilou hileh tunia hi eihon bol ding ingaito dingu ahivangala amabol banga boltheiding koimacha ium jou lou dingu ahi. 13 Solomon in, amasa pentah in, vannoi leiset chihna thepna ho ana patepin, ahinla chihna thepna chu aphachom lama imanchah theileh aphatlheh vangin, chihna thepna sangtah imupouleh kipana ahijeng e, tinading imacha ana umpon ahi. Tuninjong mitamtah in chihna thepna hi angolpi tho sohkei tobang ahin, tahsa hinkho kihinso theina dinga aphatchom lheh vangin, hichehin hinkhoa kipana tahtah eipeh theiyu ahipoi ti imudohthei yuve. Ajehchu, Solomon chu leiset chunga aching penle athempen anahi, ahinla achihna athepnan imacha kipana ana petheipoi. Anichanna aman anapatepho chu ahileh leisetna akihinlona pen tichu leiset nopsahna (pleasure) man dingdan hohi anahi. Adeh a golnop, games, party, nehle don, lam (dance) chuleh adangdang tahsa nopsahna jatchomchom jong anapatep in, ahinla hicheho jouse chu mihemin leiset chunga anopsahpi ding ahi atihih beh e. Hitobanga hinkho man chu, hinlo ahi e atinai saipoi. Kipana dinga ingaitonau kipana ahiloudan photchetna joh anamun ahi. Pannabei huinung del lele tobang akihi anati.(Thuhilpa 2:1-3). Athumna a aman anapatep khat chu ahileh, tunin jong mijousen kihao poupouleh nop kisa nante tihi mitamtah ngaichat/ginchat chu ahi. Solomonhi mihaotah ahin, hijeh a chu ahao na a kona chu ipi hijongleh achoh jengthei, athaneina a kona jong aboljengthei mikhat chu ana hin, ahinla itobang angaito vangin neilegou haona hiche leisetna ineileh hinkho chu hijeng thei ahipoi tijong anaphotchet tan ahi. Aman ahetdoh khat chu ahileh, koi hijongleh vannoi leiset thilkeova lunglutna neiho ahilouleh vannoi leiset thil ngailu ho chu leisetna kipah louhel diu ahi. Ajehchu amahon alhagao hinkhou akisuhmo diu ahi. Lhagaova hinna dihtah neilouva chu kipana umtheilou ahi. Achaina a aman imajouse akholsoh keinunga amudoh chu ahileh, PATHEN GING INLANG ATHUPEH HO JOUSE NIT IN, HICHE CHU MIHEMIN HINKHOA AKIPATHEINA DINGA ABOL DING PIPEN CHU AHI. Ajehchu, Pathenin na kitong jouse chunga, ase hihen apha hijongleh Thupi tanna a ahinpoh lut ding ahi.(Thuhilpa.12:13-14.) Pathenin asimho jouse phatthei bohtahen.
AHITHEILOU HISAH THEI HATCHUNGNUNG PATHEN CHU IHOU U AHI
Zachariah le Elizabeth anilhona Pathen mitmua chondihtah gel themmona neilou Pakai thupeh jouse le chonna danthu jouse jui kimkeiya ahilhone. Amabou Elizabeth achin (barren) jeh’in cha neilou ahilhone; chuleh anilhonin hateh-in atehgel lhontan ahi. Amavang vantil chun ama jah a Zechariah kicha hih-in nataona aki ngaitai; chuleh na-inneipi Elizabeth chun chapa khat ahin ding ahi, chuleh nangman amin John nasah ding ahi. Luke 1:6,7 & 13 11 Sopiteho, hiche lai muna Zachariah le Elizabeth chungchang thu dol hi ivetna ahileh Joseph le Mariam hinkhoa imu banguvin, amanihi Pathen mitmua chondihtah leh Pathen thupeh juikim kei nolna bei ahilhone akiti. Amavang chubangtah a Pathena kitah tah ahilhon vangin, chaneilou ahilhone akiti. Ajehchu, Elizabeth chu aching anahi. Chubang tah a Pathen na dinga hat tah cheh ahilhon vanga adeitah lhon cha ananei thei lhonpoi. Ahivangin amani acha neilhon louvangin athase deh lhonpon, Pathena dinga kitah tah a atohding dol lhon akitoh jing thou thou lhone. Ahinla amani semthei thil ahilou jeh chun, Pathen ahouding dol bepin ana kihou lhonin ahileh Pathenin achunglhonah thil kidang tah khat ahin boldoh peh lhon tan ahi. Chaneithei ahilai lhonin, cha aneilhon tapon, ahinla amani alhasam deh lhonpoi. Tun hateh in ateh lhon tan, chaneithei ahilhon tapoi. Channei na dinga jong taolhon taponte. Hitobang chaneitheilou ahinung sang lhonchun, Pathen Vantil Gabriel in Zechariah koma kicha hih in nataona akisangtai, najinu gaijintin, chapa khat ahin ding amin John nasah ding ahi. Hiche a eihodinga kihilna phatah chu ipiham itileh, Pathen chu atahtah a nolna beihel a nahou dingdola nahou jingthei poupouleh nangaichat nadeichat thilho chu aphat akilehtai, ageitai or akipeltai tinading ima cha aum poi tina jong ahi. Numei atehsa khat in bon cha aneitheija ahileh adang ahimo ipi umding ham ? Bible in PATHENA DINGIN IMACHA AHIMO AUMPOI, atina chu ahi. Sopiteho, hiche message a kona eihon iphatchom pi theiding u chu ahileh, amasapen tahin I Pathen hou uhi Jesus katahsane ti maimai jin ngapou hitin, Pathen katahsane tijousen Ama mitmua chondihtah hiding, kitahtah hiding, athupeh jouse juikim mi hiding ahi. Pathen chu dihtah leh kitah tah a ihoupou pou leh leisetna idei ingai kimu henlang kimuhih jongleh thase loubeh a Pathen a dinga ihouding dola lunglut tah leh thanomtah a ihouthei pou pou leh hichu Pathenin eipatepna khat jong ahin, hiche patepna a chuPathen mitmua nalolhinleh nadei nangai jong namuthathei ahi tihi kichen tah in imutauve. 12 Ajehchu Pathen a dinga imacha ahimo aumpoi. Ama a kona imajouse um ahin, amadinga bolmo, ahimo khatcha aumpoi amalung lam ahi pou pou leh.Hijehchun, tulai Pathen houbanga kapengthah tai, Pathen katahsane tia, inop nop a hinkho man kitihohi amaho hinkhotoh kikal ahi. Adihtah a seijin, Pathen cha kahi tijousen, achesa a Pathen mite umchan khanchan ithodiu ngaijah ahi. Tunin, koimachan Pathen mitvetna adih atheng chuleh kitahna dingho ngaito khoh atamtapoi Hijehchun, Pathenin adeichu ipiham bolding ngaito u hite.
-------------------------------------------------------------------------
ATAHSAN CHATE PUIDINGA JESU HUNG VAH YET DING AHITAI
Ajeh chu keima nangho ding mun sema che ding kahi. Chuleh nangho ding mun sema kachea ahileh, keima umna a chu nangho jong naumthei na diuvin keima hung kit ing ting kahenga dinga kahung pui ding nahiuve John 14 :2b-3. Christa a Sopi deitahteho, Pakai Jesu eiho ding mun sema achenahi asot lheh tan, atahsan chate puija ahung nadiu nikho hi anai mongmong tai tihi vannoi thusoh lasoh hon nitinin aphong aphong jenguve. Aman kahung ding konleh hitiding khati ding ati hohi atamjo aguilhung tai. Hicheng ho lah achun, phabep gah veuhite. Gal ki satleh kidou thuthang najah dingu ahi, vai khatleh vaikhat, gamkhatle gam khat hung kidouvintin, munchom chom a kel hunglhan tin, ling kihot ding ahi.Matt.24:1-7 Alangkhatna 2Timothi 3:2-5 a chu ivetna ahileh, hiche teng chuleh mi ama chang mai kingailua, sum ngailut, nom ham, huset le hoitho, taitomhat, nuthu pa thungailou, lungsetna neilou, kihou champi mohel, hehset hat, ti kitimlou,..kiletsah chuleh Pathen ngailut sanga nopsah ngailut johna, Pathen ngaisah lhema atha hat athilbol thei janom lou, hicheng chu hung um ding ahi. Hiche hohi ivetna ahileh alhunglou behseh aum tapoi. Aman eihung puidingdan u thusim khatna konin gahveu hite. Judate hin, chena lhongpi khat aneijuvin, mikhat hin ji anei nom phatleh, aman adeichat nungah nu te ina chun achen nungahnu ina table a chun twi glass khat agatungjin, imacha sei loubehin atouvin, ijemtia nungah nu chun gollhangpa chu adeija ahilehatwichu adonpeh ding ahi akiti.Twi chu adon pehleh nungahnun kanomtai atina ahitai. Hijeh a chu gollhangpa chu kipah thanom tah a ain lama kileji ahitai. Hiche a patna chu thildanga kisaboi talouva achenna lhonding in sahna ding a chu kipeichengji ahitai. A insah chu akichai chai leh hiche nungahnu chu agakipuiji ahi akiti. Alangkhatna ahindalhah nungahnu jong chu gollhangpan ahin dalhah lhah a pat a, akigosadema gollhangpan ahin kouding chubou angaji ahitai akiti. Gollhangpa ahin kouna ding aw chu kijahih khakhante tin, sunle janin a window ahonghong jengji akiti. Hiche thusimhi kavetleh Pakaijin 15 eiho puija ahungphat leh aboldingho toh kitohchat ahijeh chun, hoi kasan hetbailam jong kasai. Eihojong, Pakai table a athisan lima kitepna antheng neho jousehi nikhatleh Pakaitoh kicheng ding kahi, tia kitepna tabang ahi. Hitia athisan donho jouse chu a Pakaipa lamtona dinga hi phat jousea abaisa a umdingdol ahi. Ajehchu, eihon anidan tah chu ihepouve. Ama eihoding mun sema ache chu ajojoleh itihphat phat hijongleh eihung pui dingu ahitai. Hijeh a chu aman nahin kouphatleh nana jah ding hinam ? Hiche kikouna awhi asunga lhagaotheng neiho jousen bou ajahdiu ahin, lhagaotheng neilouhon vang ajah phah tahloudingu ahi. Hiche kouna awgin, atahsan chate a dinga ginglenglung hintin, atahsanloute a dinga a vang guhthim thu hunghiding ahi. Ajehchu Pakai amatah aotoh vantil pipui awgintoh, chuleh Pathen sumkon gintoh kithoa vana kona hung kumlha ding ahi, chuleh Christa a thisa ho chengse thoudoh ding ahiuve; chujou le eiho ahingnalai amoh chengse hi amaho chengse chutoh VANLAIJOLLA PAKAI LAMTO DINGA meikonga toltouva ium khom dingu ; chuleh chutia chu aimatih chana Pakai toh iumkhom jing dingu ahitai.(IThess.4:16-17)
Lorem Ipsum is simply dummy text of the printing and typesetting industry. Lorem Ipsum has been the industry's standard dummy text ever since the 1500s, when an unknown printer took a galley of type and scrambled it to make a type specimen book.
Our Vision
We strive to innovate and deliver exceptional solutions that empower businesses and individuals alike. Our commitment to excellence drives us to constantly evolve and adapt to the ever-changing digital landscape.
Dedicated to fostering a collaborative environment, we believe that the best ideas emerge from diverse perspectives and open communication. We value integrity, transparency, and mutual respect in all our interactions.
Our mission is to create lasting value for our clients, employees, and stakeholders by upholding the highest standards of quality and service. We aim to be a trusted partner on their journey to success.
Our Commitment to Spiritual Preservation
I am dedicated to safeguarding and sharing the profound wisdom found in religious teachings. This platform is built on the principles of reverence, accessibility, and the enduring value of spiritual guidance.
Dedicated Sermon Archiving
Accessible Spiritual Wisdom
My platform provides free and easy access to a rich library of sermons. I believe spiritual guidance should be available to all who seek it, fostering growth and understanding.
Preserving Spiritual Wisdom
undefined
undefined
undefined